सर्गस्थितिनिरोधार्थं कामाकाममयो हि यः । तं कामं कामकामानं कामाभावाय कामये ॥ यत्कामिनीकेलिकलापकुण्ठितः कामोऽप्यका विमदो बभूव ह। तं मानिनीमानदमानदं सदा श्रीमोहनं मोहनमानतोऽस्म्यहम् ॥ यस्याङ्घ्रिपङ्कजपरागपरप्रभावाद् भूत्वा कृती कृतिमतां सृतिमाचरामि । तं सद्गुरुं सततसर्वसुखं सदग्रयं वन्दे सदा विमलबोधघनं विचित्रम् ॥ व्यासं व्यासकरं वन्दे मुनिं नारायणं स्वयम् । यतः प्राप्तकृपालोका लोका मुक्ताः कलेर्ग्रहात् ॥ यस्य तुण्डाच्च्युतश्चूतो राजतेऽयं रसात्मकः । तमच्युतकथाकुञ्जे सुकूजन्तं शुकं भजे ॥ श्रीधरं श्रीधरं वन्दे श्रीधरैकपरायणम् । यस्यैव श्रीप्रसादेन श्रीधरेयं कृतिः कृता ॥ राधा भक्तिर्हरिर्ज्ञानं ताभ्यां या च समन्विता । तां श्रीभागवतीं गाथां वन्दे युगलरूपिणीम् ॥